பெண்களுக்கு உகந்த பொறியியல் படிப்புகள்!

பெண்களுக்கு உகந்த பொறியியல் படிப்புகள்!

ஒரு காலத்தில் பெண்களுக்கு பொறியியல் படிப்பே பொருந்தாது என்றொரு எண்ணம் இருந்தது. எங்கேனும் சில பெண்கள் சிவில் இன்ஜினியரிங் முடிப்பதுண்டு. அவர்களை விசித்திரமாக பார்த்த சமூகம்தான் இது. இன்று, அந்த பாகுபாடு தகர்ந்து விட்டது. ஆண்கள் பங்களிக்கிற, ஏன் ஆண்களே தொடத் தயங்கும் துறைகளைக் கூட பெண்கள் தொட்டு சாதித்துக் கொண்டிருக்கும் காலம் இது!

பொறியியல் படிப்புக்கு பெண்கள் வரத் தொடங்கிய காலங்களில் சிவில் படிப்பின் மீதே அவர்கள் கவனம் குவிந்திருந்தது. கம்ப்யூட்டர் சயின்ஸ் படிப்பு வந்தபிறகு, அதுவே பாதுகாப்பான படிப்பாக கருதப்பட்டது. அந்தச் சூழலும் இப்போது மாறிவிட்டது. இன்று பெண்களுக்கு இந்தப் படிப்புதான் பொருந்தும் என்றெல்லாம் வரையறை செய்ய முடியாது. மரைன் இன்ஜினியரிங், மைனிங் இன்ஜினியரிங் போன்ற படிப்புகளில் பெண்கள் சேர்க்கப்படுவதில்லை.

காரணம், அத்துறை சார்ந்த விதிமுறைகளே பெண்களை சற்று விலக்குகின்றன. மற்றபடி எல்லாத் துறைகளுமே பெண்களுக்கு பொருந்தக்கூடியதுதான். இருப்பினும் பெண்களுக்கு கச்சிதமாக பொருந்தும் படிப்புகள் சிலவற்றைப் பார்க்கலாம். ஆர்க்கிடெக்ட் பெண்களின் இயல்புக்கு ஏற்ற படிப்புகளில் முதன்மையானது ஆர்க்கிடெக்ட் படிப்பு. சமூகத்தில் மிகுந்த மரியாதையையும், பெருமளவு வருமானத்தையும் தரவல்லது. கற்பனையும் பொறுமையும் ஈடுபாடும் இப்படிப்புக்கான முதன்மைத் தகுதிகள்.

படித்தவுடன் வேலை கிடைக்க வேண்டும் என்பதுதானே பல மாணவர்களின் எதிர்பார்ப்பு. கேம்பஸ் இன்டர்வியூவிலேயே வேலை கிடைத்துவிட்டால் ரொம்பவே நல்லது. நூற்றுக்கு இரண்டு பேர் கூட படிப்பை முடித்து, ‘நான் 10 பேருக்கு வேலை கொடுப்பேன்’ என்று இலக்கு வைப்பதில்லை. அப்படி இலக்கு வைத்துப் படிக்கும் பெண்களுக்கு ஏற்றது ஆர்க்கிடெக்ட் படிப்பு.

இப்படிப்பை முடித்தவர்கள் சுயமாகவே தொழில் செய்யலாம். இந்திய உள்கட்டமைப்புத் துறை மிகப்பெரும் வளர்ச்சியை எட்டி வரும் தருணம் இது. இளம் தலைமுறையின் பெருங்கனவாக இருப்பது சொந்த வீடுதானே? அதன் காரணமாக ஆர்க்கிடெக்ட் படித்தவர்களுக்கான தேவையும் உயர்ந்து கொண்டு போகிறது.

பி.ஆர்க் எனப்படும் ஆர்கிடெக்ட் ஐந்தாண்டு காலப் படிப்பாகும். இதைப் படிக்க விரும்புபவர்கள் NATA என்ற தேசிய நுழைவுத்தேர்வு எழுத வேண்டும். இத்தேர்வை கவுன்சில் ஆப் ஆர்க்கி டெக்சர் அமைப்பு நடத்துகிறது. இத்தேர்வுக்கு ஆகஸ்ட் 18ம் தேதி வரை விண்ணப்பிக்கலாம் (Home). நுழைவுத்தேர்வு அடிப்படையில் ரேங்க் பட்டியல் தயாரிக்கப்பட்டு கவுன்சலிங் நடைபெறும்.

சிவில் இன்ஜினியரிங்

இதில் நிறைய கிளைப்படிப்புகள் வந்து விட்டன. ஜியோ இன்ஃபர்மேட்டிக்ஸ், டவுன் அண்ட் கன்ட்ரி பிளானிங், இன்டீரியர் டிசைனிங், டிரான்ஸ்போர்ட்டேஷன், சாயில் டெக்னாலஜி, ஓஷன் அண்ட் கோஸ்டல் இன்ஜினியரிங் ஆகிய பிரிவுகளில் புதிய பொறியியல் படிப்புகள் உள்ளன. இளநிலையில் சிவில் இன்ஜினியரிங் முடித்துவிட்டு, முதுநிலையில் இதுபோன்ற கிளைப் படிப்புகளை படிப்பது புத்திசாலித்தனம். மத்திய, மாநில பொதுப்பணித்துறை உள்பட பல்வேறு துறைகளில் திறமையான சிவில் பொறியாளர்களுக்கு வாய்ப்புகள் காத்திருக்கின்றன. ரியல் எஸ்டேட் துறையின் வளர்ச்சியால் தனியார் நிறுவனங்களிலும் வாய்ப்புகள் பெருகி வருகின்றன. சுயமாகவும் தொழில் செய்யலாம்.

கம்ப்யூட்டர் சயின்ஸ், இன்ஃபர்மேஷன் டெக்னாலஜி

இது போன்ற படிப்புகள் பெண்களுக்கு எப்போதுமே எவர்கிரீன் தான். ‘ஐ.டிக்கெல்லாம் வேல்யூவே இல்லை... படிச்ச பல ஆயிரம் பேர் வேலையில்லாம இருக்காங்க...’ என்று பலர் சொல்லிக் கேட்டிருப்பீர்கள். ஓரளவுக்கு இதில் உண்மை இருக்கிறது. ஆனால், இதற்கு இன்னொரு பக்கமும் உண்டு. இன்று உலகில் அதிகம் மென்மொருள் அவுட்சோர்சிங் செய்யும் நாடு இந்தியாதான். அடுத்த பத்தாண்டுகளில் பல லட்சம் மில்லியன் டாலர் இந்திய மென்பொருள் சந்தையில் முதலீடாக வர இருக்கிறது.

இப்போதே, இந்தியாவில் செயல்படும் பிரதான மென்பொருள் நிறுவனங்கள் தங்களுக்கு ஏற்ற, தகுதிவாய்ந்த ஊழியர்கள் கிடைக்காமல் தவித்துக் கொண்டிருக்கின்றன. ‘ஏதோ நாமும் கம்ப்யூட்டர் இன்ஜினியரிங் படிக்கிறோம்’ என்று இல்லாமல், உலகளாவிய தொழில்நுட்ப அறிவை வளர்த்துக் கொள்வதோடு, படிக்கும் காலத்திலேயே தேவையான மென்பொருட்களை கற்றுக்கொண்டு, ஆளுமைத் தன்மையையும், மொழித்திறனையும் மேம்படுத்திக் கொள்ளும் மாணவர்களுக்கு மென்பொருள் நிறுவனங்களில் சிவப்புக் கம்பள வரவேற்பு காத்திருக்கிறது.
மிகவும் கவனிக்க வேண்டியது,

கல்லூரியின் தரம். அண்ணா பல்கலைக் கழகத்தின் கீழ் செயல்படும் டயர்1 கல்லூரிகளில் கம்ப்யூட்டர் இன்ஜினியரிங்படிக்கும் மாணவர்களுக்கு பெரும்பாலும் வளாகத் தேர்வுகளிலேயே வேலை உறுதியாகி விடுகிறது. இவ்விதம் உரிய தகுதியோடு படிப்பை முடித்துவிட்டு வெளிவரும் மாணவர்களின் எண்ணிக்கை வெறும் 24 சதவிகிதம் மட்டுமே என்பது கவனிக்கத்தக்க புள்ளி விவரம். கம்ப்யூட்டர் இன்ஜினியரிங் படிப்பில் இருந்து கிளைத்த படிப்புகள் நிறையவே உண்டு.

கம்யூனிகேஷன் & கம்ப்யூட்டர் இன்ஜினியரிங் என்ற படிப்பு இந்தாண்டு வந்துள்ளது. கம்ப்யூட்டர் சயின்ஸ் அண்ட் இன்ஃபர்மேஷன் டெக்னாலஜி என்றொரு படிப்பும் இருக்கிறது. கம்ப்யூட்டர் சாஃப்ட்வேர் இன்ஜினியரிங், இன்ஃபர்மேஷன் அண்ட் கம்யூனிகேஷன் டெக்னாலஜி, இன்ஃபர்மேஷன் டெக்னாலஜி அண்ட் மேனேஜ்மென்ட் போன்ற படிப்புகளும் புதிதாக வந்துள்ளன. இந்தப் படிப்புகளுக்கும் சிறப்பான எதிர்காலம் உள்ளது.

மெக்கானிக்கல் இன்ஜினியரிங்

மெக்கானிக்கல் எல்லாம் பெண்களுக்கு பொருந்தவே பொருந்தாது என்று கருதப்பட்ட காலம் ஒன்று உண்டு. கடந்த சில வருடங்களில் இந்த நம்பிக்கை தகர்ந்து விட்டது. இது வேலைக்கு மினிமம் கியாரன்டி தரும் படிப்பு என்பதில் சந்தேகமில்லை. குறிப்பாக பெண்களுக்கு இத்துறையில் வேலைவாய்ப்பு நிறைந்திருக்கிறது.

மத்திய அரசு, உலக வங்கி போன்ற நிறுவனங்கள் திட்டத்துக்கான நிதியை ஒதுக்கீடு செய்யும்போது, பணிபெறும் நிறுவனத்தில் ஆண்களுக்கு இணையாக பெண்களுக்கும் பணியாற்ற வேண்டும் என்ற நிபந்தனையை சில ஆண்டுகளாக விதிக்கிறார்கள். இப்பிரிவிலும் நிறைய சிறப்புப் படிப்புகள் வந்து விட்டன. ஏரோநாட்டிக்கல் நிறைய இளைஞர்களை வசீகரிக்கிறது. ஏரோஸ்பேஸ் படிப்புக்கும் நிறைய வரவேற்பு இருக்கிறது. ஆட்டோமொபைல், இண்டஸ்ட்ரியல் இன்ஜினியரிங், மேனுஃபேக்சரிங் இன்ஜினியரிங், பிரின்டிங் டெக்னாலஜி, டிசைன் அண்ட் மேனு ஃபேக்சரிங், எனர்ஜி, இண்டஸ்ட்ரியல் இன்ஜினியரிங் அண்ட் மேனேஜ்மென்ட், புரொடக் ஷன் இன்ஜினியரிங், மைனிங், மெட்டீரியல் சயின்ஸ் அண்ட் இன்ஜினியரிங், இண்டஸ்ட்ரியல் அண்ட் புரொடக் ஷன் இன்ஜினியரிங் என இதில் ஏகப்பட்ட கிளைப் படிப்புகள் உண்டு. ஆட்டோமொபைல் இன்ஜினியரிங், மேனுஃபேக்சரிங் இன்ஜினியரிங் படிப்புகள் பெண்களுக்கு மிகவும் பொருத்தமானவை.

ஏரோநாட்டிக்கல், ஏரோஸ்பேஸ் படிக்க நினைப்பவர்கள் மிகவும் கவனமாக கல்லூரியைத் தேர்வு செய்ய வேண்டும். போதுமான உள்கட்டமைப்புகள் இருக்க வேண்டும். தகுதிவாய்ந்த பேராசிரியர்கள் இருக்க வேண்டும். இப்படிப்புகளுக்கு செலவும் அதிகம் பிடிக்கும். மேலும், இப்படிப்புகளுக்கான வேலைவாய்ப்பு வரம்புக்கு உட்பட்டவைதான்.

பொதுவாக, இளநிலையில் பிரதான படிப்பான மெக்கானிக்கல் இன்ஜினியரிங்கையே நேரடியாக படிப்பது சிறந்தது. விரும்பினால் முதுநிலையில் சிறப்புப் பிரிவுகளைப் படிக்கலாம். புராடெக்ட் டிசைனிங், ஆட்டோமேட்டிவ் டிசைனிங், வெல்டிங் இன்ஜினியரிங், பைப்பிங் இன்ஜினியரிங், எனர்ஜி இன்ஜினியரிங், தெர்மல் இன்ஜினியரிங் என மெக்கானிக்கல் இன்ஜினியரிங் முடித்தவர்களுக்கு முதுகலை படிக்க பல்வேறு சிறப்புப் பிரிவுகள் இருக்கின்றன.

எலெக்ட்ரிக்கல்

இப்பிரிவில் எலெக்ட்ரிக்கல் அண்ட் எலெக்ட்ரானிக்ஸ். இன்ஸ்ட்ருமென்டேஷன் கன்ட்ரோல் என இரண்டு கிளைப்படிப்புகள் உள்ளன. ஈடுபாடும் திறனும் கொண்ட பெண்களே இப்படிப்பை தேர்வு செய்ய வேண்டும். இப்படிப்பு முடித்தவர்களை அண்மைக்காலமாக மென்பொருள் நிறுவனங்களும் தேர்வு செய்கிறார்கள்.

இன்ஜினியரிங் துறையில் மற்றுமொரு அடிப்படைப் பிரிவான எலெக்ட்ரானிக்ஸ் இன்ஜினியரிங்கிலும் வாய்ப்புகளுக்குக் குறைவில்லை. இதுவும் பெண்களுக்கு ஏற்ற துறையே. எலெக்ட்ரானிக்ஸ் நிறுவனங்கள் மட்டுமல்ல... மென்பொருள் நிறுவனங்களிலும் வேலை வாய்ப்புண்டு.

இப்பிரிவில் எலெக்ட்ரானிக்ஸ் அண்ட் கம்யூனிகேஷன் இன்ஜினியரிங், எலெக்ட்ரானிக்ஸ் அண்ட் டெலி கம்யூனிகேஷன்ஸ், எலெக்ட்ரானிக்ஸ் அண்ட் இன்ஸ்ட்ருமென்டேஷன், மெடிக்கல் எலெக்ட்ரானிக்ஸ் போன்ற சிறப்பு கிளைப் படிப்புகள் இளநிலையில் உண்டு. வேதியியலில் ஆர்வமுடைய மாணவிகள் கெமிக்கல் சார்ந்த படிப்புகளைத் தேர்வு செய்யலாம்.

கெமிக்கல் டெக்னாலஜி, மெட்டலர்ஜிக்கல் இன்ஜினியரிங், மெட்டலர்ஜிக்கல் இன்ஜினியரிங் அண்ட் மெட்டீரியல் சயின்ஸ், கெமிக்கல் அண்ட் எலெக்ட்ரோ கெமிக்கல் இன்ஜினியரிங், செராமிக் டெக்னாலஜி, பெட்ரோலியம் இன்ஜினியரிங், பெட்ரோலியம் டெக்னாலஜி, பெட்ரோ ரீபைனரிங் அண்ட் பெட்ரோலியம் டெக்னாலஜி, பிளாஸ்டிக் டெக்னாலஜி, ரப்பர் அண்ட் பிளாஸ்டிக் டெக்னாலஜி, ஃபெர்டிலைசர் அண்ட் கெமிக்கல் டெக்னாலஜி, ஃபுட் டெக்னாலஜி, டெக்ஸ்டைல் டெக்னாலஜி, பல்ப் அண்ட் பேப்பர் டெக்னாலஜி போன்ற படிப்புகளை இதன் கிளைப் படிப்புகளாக வரையறுக்கலாம்.

இவற்றில் பெட்ரோலியம் இன்ஜினியரிங், பெட்ரோலியம் டெக்னாலஜி, பெட்ரோ ரீபைனரிங் அண்ட் பெட்ரோலியம் டெக்னாலஜி போன்ற படிப்புகள் சில பெண்களின் இயல்புக்கு சற்று பொருந்தாமல் போகலாம். அதனால் மிகவும் கவனமாகத் தேர்வு செய்ய வேண்டும்.

பயோ டெக்னாலஜி

பயாலஜியில் ஈடுபாடுள்ளவர்கள், மருத்துவம் கிடைக்காத நிலையில் மனம் தளர்ந்து போயிருப்பார்கள். அவர்கள் இன்ஜினியரிங்கில் பயோ பிரிவுகளைத் தேர்வு செய்யலாம். பயோ பிரிவுகளில் முதுநிலை முடித்தவர்களுக்கு ஏராளமான வேலை வாய்ப்புகள் உண்டு. பயோ படிப்புகளில் பயோடெக்னாலஜி குறிப்பிடத்தகுந்தது. இப்படிப்புகளை தரம் வாய்ந்த உள்கட்டமைப்பு, ஆய்வகங்கள் கொண்ட கல்லூரியைத் தேர்வு செய்து படிக்க வேண்டும். இண்டஸ்ட்ரியல் பயோ டெக்னாலஜி, பயோ மெடிக்கல், பயோமெடிக்கல் இன்ஸ்ட்ருமென்டேஷன், பயோ இன்ஃபர்மேஷன், பார்மசூட்டிக்கல் டெக்னாலஜி, பார்மசூட்டிக்கல் இஞ்சினியரிங் போன்ற படிப்புகள் உண்டு. இவை அனைத்துமே வேலைவாய்ப்பு மிகுந்த படிப்புகளே. எங்கு? எப்படி?

பொறியியல் படிப்புகளைப் பொறுத்தவரை கணிதம் அடிப்படை. ‘கணக்கு என்றாலே கசப்பு’ என்பவர்கள் தயவுசெய்து பொறியியலை தள்ளி வைத்து விடலாம். பொறியியலில் எதைப் படிக்கிறோம் என்பதைக் காட்டிலும், எப்படி, எங்கு படிக்கிறோம் என்பதைப் பொறுத்தே எதிர்காலம் நிர்ணயிக்கப்படும். ஈடுபாட்டோடு படிக்க வேண்டும். கல்லூரியின் நூலகத்தை பயன்படுத்த வேண்டும். உங்கள் துறையில் உலகளாவிய அப்டேட் செய்திகளை தெரிந்து வைத்திருக்க வேண்டும். துறை சார்ந்த இதழ்கள், புத்தகங்களை வாசிக்க வேண்டும். முழுமூச்சாக கவனச்சிதறல் இன்றி படித்தால் மிகச்சிறந்த எதிர்காலம் உங்களுக்கு உண்டு. வாழ்த்துகள்!

பொறியியலில் எதைப் படிக்கிறோம் என்பதைக் காட்டிலும், எப்படி, எங்கு படிக்கிறோம் என்பதைப் பொறுத்தே எதிர்காலம் நிர்ணயிக்கப்படும்.

மத்திய அரசு, உலக வங்கி போன்ற நிறுவனங்கள் திட்டத்துக்கான நிதியை ஒதுக்கீடு செய்யும்போது, பணிபெறும் நிறுவனத்தில் ஆண்களுக்கு இணையாக பெண்களுக்கும் பணியாற்ற வேண்டும் என்ற நிபந்தனையை சில ஆண்டுகளாக விதிக்கிறார்கள்.